EAJ-PNVko Nerea Ahedo senatariak Mónica García ministroari aurpegiratu dio estatutupeko langileen Estatutu Markoa negoziatzeko Osasun Ministerioari dagokion erantzukizuna autonomia erkidegoei egozten “tematuta jarraitzea”. Ahedoren esanetan, ministroak "ez ditu bere eskumenak ulertzen edo ez ditu ulertu nahi; Euskadin ondo dakigu zeintzuk diren gureak", esan du, eta "etxeko lanak" egiteko eta medikuekin negoziatzeko eskatu dio. Gaur arratsaldeko osoko bilkuran, jeltzaleen ordezkariak Mónica Garcia ministroari gogorarazi dio negoziazioaren, lanbide-sailkapenaren, erretiroaren... esparru propioa "bere teilatuan" dagoela, eta bere erantzukizuna ez diezaiela beste batzuei egotzi. "Sindikatuek ziurtatu dute Autonomia Erkidegoan lortutako akordioek ez dutela balioko mobilizazioak desaktibatzeko", adierazi du.

Ahedok azpimarratu du Espainiako ministerioak "akatsa" egin duela Lege Aurreproiektua mediku kolektiboaren erabateko gaitzespenarekin Ministroen Kontseilura eramanez, hauek "ez direnean ordezkatuta eta entzunda sentitzen". Hala, ministroari negoziatzeko "interesik eza eta ezintasuna" leporatu dio, eta galdetu dio ea dagokiona egin duela uste duen, “eta ea gero hanka sartzea nork konpontzen duen", edo negoziatzen jarraituko duen. Ildo horretan, jarraitutako prozedura ere gaitzetsi du, "lehenik Ministroen Kontseilura bidaliz eta ondoren autonomia-erkidegoei helaraziz. Ea zer kontatzen diezuen bihar!", adierazi du ezohiko Lurralde arteko Kontseiluari erreferentzia eginez.

Senatari abertzaleak berretsi du Estatutu Markoa ministerioaren eskumen esklusiboa dela, eta "gatazkaren sustraia; autonomia-erkidegoek sortu ez duten gatazka baina berau sufritzen dutenak". Gogorarazi duenez, osasun-sistema autonomikoetan asistentzia-inpaktu metatzaile handia eragiten dute, "are gehiago osasun-hornidura nagusiki publikoa denean, sare paralelorik gabe, Euskadiren kasuan bezala", zehaztu du. "Azkenean, eragina du pazientearengan eta ematen zaion arretan", "bitartean, grebek ez dute Ministerioa ukitzen eta pazienteek, egoera honetako paganoek, ez dute zure atea joko, Osakidetzarena baizik. Harria bota eta eskua ezkutatuko al duzu? ", galdetu dio ministroari.