Gaur goizean Goi Ganbaran hasi den kontrol saioan, Elena Etxegoyenek Jordi Sevilla Ministroari Gobernu eta Administrazio Lokalaren Lege Proiektuari buruz galdetu dio. Sevillaren hitzetan "lehenbailehen" tramitatuko da.

Bere mintzaldian, senatari jeltzaleak lege honen garrantzia azpimarratu nahi izan du. Gobernu sozialistak hasieratik esan zuen bere helburu nagusien artean zegoela; aitzitik, oraindik ez da Gorteetara iritsi. Zentzu honetan, Etxegoyenek zailtasunak onartu arren, "beranduegi iritsi" dela kritikatu du; "honek, Gorteetan, Senatuan bereziki, gutxi sakontzeko aukera emango digu", adierazi du senatariak.

Bukatzeko Etxegoyenek administrazio lokalaren garrantzia gogorarazi dio Sevilla jaunari, izan ere "hiritarrari gertuen geratzen zaion administrazioa baita".