ETBn egin dioten elkarrizketan galdetu diote Bildarratzi Estatus Berriari buruzko Ponentziaren inguruan. Senatari jeltzaleak azaldu duenez "Batzorde honekin aukera bat  zabaltzen zaigu une honetan Eusko Legebiltzarrean. Herri honetako lau ardatz nagusiak ditugu, eta euskal hiritarrok izan nahi duguna adostu behar dugu. Hortik aurrera, Madrilgo gobernuarekin negoziatuko dugu, eta geroago ikusiko dugu zein den hiritargoak egin denaren inguruan duen irizpidea".

Dena dela, Bildarratz minduta agertu da "Jokoan hasi baino lehen, batzuk iritziak ematen hasi dira, eta ez luke horrela izan behar". Euskal politikariaren esanetan "Ponentzian parte hartuko duten indar politiko guztiek eraman beharko lukete negoziatzeko ideia, eta lau ardatz errespetatu beharko lituzkete: elkarrizketa, negoziaketa, akordioa eta berrespena. Inportanteena da lan metodologia irizpide horien oinarrian mantentzea. Ponentzia horretatik ideia onak atera behar dira Eusko Jaurlaritzak forma eman diezaien. Albo batean utzi behar ditugu zalapartak eta itxurakeriak, eta mahaiaren inguruan eseri behar dugu bakoitzak bere historia daramala ulertuta. Guk helburu batzuk ditugu, PSEk beste batzuk izango ditu... eta denok elkarrekin ekin behar diogu hiritargoari erantzuteko".

Amaitzeko gaineratu duenez "Eusko Legebiltzarraren eta alderdi politikoen lan hau dago hauteskunde prozesuen gainetik. Lan metodologia bat adostu beharko da, testu bat eta adostutako borondate bat emango diguna. Akordioetara iristeko borondatea behar dugu, trantsizioaren izpiritua behar dugu, denon eskuzabaltasuna. Akordiora ikuspuntu ezberdinetatik iritsi behar dugu".