Senatuko Euzko Abertzaleak Taldeak Estatu espainolak Europar Batasunarekin osasun zein lan arloan exijitzen diren neurriak ez betetzeagatik akordiorik ez duten herrietatik atun trontzoak inportatzeko kuota ezaba dezala eskatu du. Jose Maria Cazalis izan da Talde Popularrak aurkeztutako mozioaren kontrako iritzia jakinarazi duena. Azkenik onartu den ekimenaren ondorioz, Batasunatik kanpoko balizko lehiakideen aurrean kontserba enpresen aldeko neurriak hartzea eskatuko zaio Estatuko Gobernuari.

Senatari jeltzalearen iritziz, zenbait kontserba enpresak babesten duten ekimen hau “ez da koherentea”, izan ere, hirugarren puntuan herri hauetako kontserbek eskatutako baldintzak bete arte Europar Batasunean ez sartzeko eskatzen duen bitartean, “eta hau eskatzen badute, betetzen ez dituztelako baino ez da”, lehen eta bigarren puntuetan herri hauetatik atun trontzoen zerga-gabeko kuota gehitzea eskatzen dute. “Hau da, kontserbarik ez sartzea nahi dute, baina bai lata horietan amaituko luketen trontzo berberak, baldintza berdinetan arrantzatuta izango liratekeenak”.

Produktu horien lege-, lan- eta osasun baldintzak bermatzea da Euzko Abertzaleak Taldearen helburua; Euskadin eta Estatu espainolean lanpostuak mantentzeko ahalegina egiteaz gain. “Kuota gaur egungo 22.000 tonatatik eskatuko diren 30.000 tonatara handituz, lan eskaera gutxituko litzateke Estatuan. 1.000 lagun behar badira, 288 egunetan zehar lan handia eginez, atuna osorik manipulatzeko, lan hori saihestuz lanpostu horiek ere desagertuko lirateke. Arrantzale gutxiago ere behar izango lirateke arrantzuan irteteko, gure ontzitegiek itsasontzi gutxiago eraikiko lituzkete…”.

Lopez Veiga izan da Alderdi Popularraren posizioa azaldu behar izan duen senataria. Arrantzu sektoreari eraso egiteaz gain –Espainiako bandera ez dutela eraman nahi, baina itsaso zabalean babesa jasotzeko armadaren laguntza eskatzen dutela esanez-, garapen bidean dauden herrien aurka egiten duela egotzi dio ordezkari jeltzaleari. “Guztiz kontrakoa da”, azaldu du Cazalisek. “Jarduera erregulatzeko Europako Batasunarekin akordioak egin daitezke. Hau egiten duten herrialdeek gutxieneko osasun eta lan baldintzak bete behar dituzte, besteetan kontrolik ez dagoen bitartean. Azken horietan dago, eta horrela dago frogatuta zenbait kasutan, legez kanpoko arrantzua, esklabotza, adin txikikoen esplotazioa eta inoiz Europako Batasunak ere zigortu dituen osasun baldintza eskasak”. Giza eskubideen aurkako jarduera hauek hainbat erakundek salatu dituzte; ekologistak, Laneko Nazioarteko Erakundeak edota Environmental Justice Foundation, besteak beste.

EAJren jarrera indartzeko, gainera, datuek erakusten dute Espainiako bandera daramaten ontzidiek, Espainiako kapitala duten beste herrialde batzuetako enpresek eta Europar Batasunarekin hitzarmenak dituzten herrialdeek eskuratzen dituzten atunekin “nahikoa da Europar Batasuneko kontserba enpresak hornitzeko”.