Maria Eugenia Iparragirrek Estatuko Gobernuak Hizkuntza Gutxituen Europako Gutunaren edukiak ez dituela betetzen salatu du, Estatuaren Administraziotik hiritarrek arlo publiko zein pribatuan euskara erabiltzeko duten eskubidea bermatzeko “inolako pausorik ez dela eman” iritzita, Gutunean hizkuntza koofizialeetarako Estatu espainiarrak onartu zuen bezala.

Alderdi Popularrak Gobernuari gaztelania bultzatzeko eta sustatzeko neurriak har ditzan aurkeztu duen mozioaren harira, EAJren senatariak bere garrantzia onartu duen arren, “erakundeen bultzadari ez duela behar” iritzi dio, “oso bermatuta dagoen hizkuntza delako”; horregatik, ekimenaren aurka bozkatu du.

Gainera, ekimenak Estatuan hitz egiten diren gainontzeko hizkuntza koofizialak aipatu ere ez egitea gaitzetsi du, hain zuzen ere gaztelaniak baino babes handiagoa behar dutenak. “Europako Gutunak arriskuan dauden hizkuntzak babesteko konpromisoa jasotzen du; Konstituzioak hizkuntzen koofizialtasuna eta babes berezia behar duen kultur ondarea direla aipatzen du, baina Gobernuak kontrakoa egiten du; ez ditu hizkuntza koofizialen eskubideak errespetatzen”.