Maria Eugenia Iparragirrek Forondako aireportuak eguneko 24 orduetan jardutea eskatu dio Estatuko Gobernuari. Hurrengo Sustapen Batzordean eztabaidatuko den mozio baten bitartez, EAJko senatariak aireportua egun osoan zabalik egon dadila nahi du honen operatibotasuna “azpiegitura erabili nahiko lukeen edonork edozein operazio egiteko mugarik gabe bermatzeko”.

Sustapen arloko bozeramaile jeltzalearen iritziz, “amaiera gabeko espirala da” Ministerioak aukera hori ez emateko erabiltzen duen argudioak sortzen duen egoera. Izan ere, egia bada 24H izaera izateko hegazkin konpainiek bertan lan egiteko eskaera egin behar dutela, egia da, baita ere, izaera hori ez izanak eta horrek dakarren malgutasun ezak Gasteizen lan egiteari uko egitea eragiten dietela hauei”.

Ez da hau lehen aldia Iparragirrek ardura honen eskumena duen Espainiako Sustapen Ministerioari eskaera hau egiten diona, baina behin eta berriz ezezkoa jaso du. Horrela gertatu zen, adibidez, 2014ko abenduan, Alderdi Popularrak 16 orduko egoera sendotzeko testua transakzionatu zuenean, edota 2015eko ekainean, ordutegia pilotuen eskolarentzat, hegazkin pribatuentzat eta aeroklubarentzat baino ez zenean zabaldu.