Imanol Landak Fake Newsen fenomenoa jorratuko lukeen azpibatzordea sortzea proposatu du Segurtasun Nazionaleko Batzorde Mistoan. EAJ-PNVren Segurtasun Nazionaleko Batzorde Mistoko bozeramailearen ustez, desinformazioaren ondoriozko arazoa are gehiago nabarmendu da COVID-19ren pandemiarekin, non "albiste faltsuen intoxikazioa hainbestekoa izan den, non 'infodemia' terminoa sortu den".

Landak azaldu duenez, "Munduko osasun-krisiak alarma eta beldurra eragin die herritar ahulei, mugikorrari itsatsita eta Googlen zalantzak argituz bizi izan dutenak, eta WhatsApp bitartez senide eta gertukoekin partekatuz; hori guztia, informazioa zurrumurruetatik, buloetatik eta arrazoirik gabeko alarmetatik bereizteko zailtasunekin". Senatari jeltzaleak deitoratu egin du gai horri "oso modu tangentzialean" heldu izana 2017ko zibersegurtasunari buruzko ponentzia batean, eta uste du "garrantzi eta traszendentzia handia" duela "legealdi honetan azpibatzorde bat sortzeko, errealitateari, ondorioei eta aplikatu beharreko neurriei sakontasunez heltzeko, zalantzarik gabeko protagonismoa eta esanahia hartu duen fenomeno bati dagokionez".

Estatuko Gobernuko Presidentearen Kabineteko zuzendari Ivan Redondok Segurtasun Sistema Nazionalaren garapenaren berri emateko eta 2018ko eta 2019ko urteko txostenak aurkezteko egin duen agerraldian, EAJ-PNVko senatariak zibersegurtasunari buruzko azterketa sakona eskatu du, pixkanaka ezartzen ari diren teknologia berriak (konputazio kuantikoa, gauzen Internet, Cloud, 5G eta adimen artifiziala) agertu direlako, eta honen ondorioz sortutako mehatxuei aurre egiteko aukerak aztertzeko.

Atalanta operazioa luzatuko da

Era berean, Landa senatariak ezinbestekotzat jo du arrantza sektorerako segurtasun baldintzak mantentzea 'Afrikako Adarra' delakoaren inguruko uretan, 'Atalanta Operazioaren' epea abenduaren 31tik aurrera luzatuz. Horri dagokionez, Gobernuko Presidentetzako Kabineteko zuzendariak Europar Batasunak Indiako ozeanoan pirateriaren aurka egiten duen operazio honek orain arte adostutako datatik harago jarraituko duela jakinarazi dio EAJ-PNVko senatariari, Somaliako piratek besteak beste Txori Argi euskal atunontziaren aurka egindako erasoak saihesteko. "Gure arrantzaleei lasaitasuna emango dien albistea da. Ez dezagun ahaztu euskal atunontziak munduko harrapaketa guztien % 10 direla; beraz, gure herriarentzat garrantzitsua den sektore baten aurrean gaude ", argudiatu du.