Maria Dolores Etxanok emakumeen aurkako indarkeria politika guztiek gaur egun eskatzen duten ikuspegi intersekzionalaren garrantzia azpimarratu du. EAJ-PNVko senatariak egiaztatu duenez, "Emakume izateagatik emakumeen aurka erabiltzen den egiturazko indarkeria hori gure gizartean egiten den giza eskubideen urraketarik larriena, ohikoena eta askotan ikusezinena da nazioartean".

Estatu Itunaren esparruan onartutako Genero Indarkeriaren aurkako estrategiei buruzko Senatuaren txosteneko akordioen jarraipena eta ebaluazioa egiteko Batzorde Berezian, non Berdintasunerako, Justiziako eta Gizarte politiketako sailburu Beatriz Artolazabal eta Emakundeko zuzendari Izaskun Landaida partaide izan diren, Eusko Jaurlaritzak egiten duen lana goraipatu du Etxanok, eta 1988an Emakumearen Euskal Erakundea sortu zela nabarmendu du. Ekintza positiboko lehen planetatik gaur egungo VII. berdintasun-planera arte; Beijing-eko Adierazpen eta Ekintza Plataforma historikoa ere gogorarazi du, egun hauetan 25 urte bete baititu NBE Emakumeak

Ildo horretan, Etxanok azpimarratu du, COVID-19ren pandemiaren ondorioz, Eusko Jaurlaritzako sailen artean egon den koordinazioa, hala nola "Enplegua eta Gizarte Politikak, Segurtasuna, Osasuna, Lana eta Justizia, baina baita Foru Aldundiekin eta udalekin ere alerta hasi zenetik, indarkeria matxistaren biktimei eskainitako zerbitzu guztiak indartuz eta bermatuz”.

"Birusa edukitzeko konfinamendu-neurriek eta mugikortasun-murrizketek areagotu egin zuten, indarkeria matxistaren esparruan, emakumeak beren etxeetan geratzeak dakarren arriskua, horiek arrisku-lekuak direla eta, beraz, emakumeen eta seme-alaben egoera larriagotu egin dela dakigunean".

Agenda politikoetan, emakume eta gizonengan eragin berdina izan ez duen krisi batean, berreraikuntzarako zereginak sartu behar dira, Emakundek egindako "berdintasuna pandemia garaian" txostenean egoki planteatzen den bezala.