Imanol Landak argi utzi nahi izan du Alderdi Popularrak "Konstituzioaren agindua haustean" duen erantzukizuna, Botere Judizialaren Kontseilu Nagusiko kideak eta Auzitegi Konstituzionaleko magistratuak berritzea blokeatzen ari delako. "Zuek, konstituzionalismoaren banderan behin eta berriz biltzen zaretenok, etsaiak zigortzeko legea betetzeko eskakizuna astintzen duzuenok, zuzenean interpelatuta sentitu beharko zenukete", esan dio oposizioko alderdi nagusiari.

Euskal Talde parlamentarioak babestu egin du Talde Sozialistak Senatuan blokeo hori bertan behera uztea eskatzeko aurkeztu duen mozioa, EAJ-PNVk irailaren 27an Kongresuan, hainbat talde parlamentariorekin batera, sinatu zuen adierazpenaren ildotik doana. "PPko jaun-andreok eta, neurri txikiagoan, Ciudadanoseko jaun-andreok, alderdi politiko horiek ez ezik, epaileek, Europako Batzordeak, Europako Kontseiluak helarazten dute eskaera hau eta, batez ere, eska dakiekeen erantzukizun instituzionalak eskatzen du", adierazi du Landak.

Senatari jeltzaleak gogorarazi duenez, organo horien berritzean izandako atzerapena, Botere Judizialaren Kontseilu Nagusiaren kasuan ia bi urtekoa eta Konstituzio Auzitegiarenean ia urtebetekoa, bi prozesuetan jasotako luzapenek bermatzen dute; hala ere, azaldu du "ez direla bere funtzionamendurako eta sistema instituzional osorako mesedegarriak", eta, besteak beste, pasibotasuna eragiten duen interinitate sentsazioa sortzen du, luzapena jasaten duen organoaren eta hartzen dituen erabakien zilegitasuna galtzea eragiten du, eta izendatuko diren kideen leialtasun alderdikoiaren susmoak eragiten ditu.

Azkenik, blokeo egoera horrek bi organoengan eragina izateaz gain, Gorte Nagusien zilegitasuna ahuldu egiten duela gaineratu du, izan ere, Gorte Nagusiek ezarritako agindu konstituzionala urratzen dute, bi organoak garaiz eta behar bezala berritzeko.