Imanol Landa EAJ-PNVko senatariak nabarmendu duenez, errege emerituak egin berri duen egonaldian erakutsi duen inpunitateak agerian uzten du, “eta hori da larriena, ez direla legeak aldatzen jokabide larri horiek berriro gertatzea eragozteko, Konstituzioak ematen dion bortxaezintasunetik, Felipe VI erregearen kasuan”. Koroaren aurkako irainak eta Espainiaren aurkako laidoak zigorgabetzeko lege-proposamena kontuan hartzeko eztabaidan, Landak Zigor Kodea eta adierazpen-askatasunaren arloko nazioarteko estandarrak erkatzea defendatu du, batez ere Giza Eskubideen Europako Auzitegiak gai horri buruz emandako doktrinarekin.

Horren harira, Landak deitoratu egin du Espainiako Gobernuak bere Urteko Araugintza Planean sartu ez izana helburu horrekin konprometitu zen lege-proiektua. “Dagokion espedientea osatzen duten estatu-organoen nahitaezko txosten guztiekin gaia zorrotz eta sakon aztertu ahal izateko, komenigarriena eta bidezkoena da. Baina lege-proiektu hori ez dago eta ez da espero horrela izatea, Gobernuaren Urteko Araugintza Planean ez baitago jasota”..

Goi-ganberak lege-proposamena izapidetzen jarraitzeari uko egiteko Koroaren defentsa argudiatu dutenei erantzunez, ordezkari jeltzaleak adierazi die “Koroa bera da gehien eta ondoen lan egiten duena erakunde anakroniko baten autosuntsiketan, Auzitegi Goreneko fiskaltzak berak bere delitu jokabidea nabarmendu duen errege emeritu pertsonalizatuta dagoena”. Hans Christian Andersenen ipuina hartuz, Landak adierazi du “erregeak ez dira inoiz egon beren herritarren eta nazioarteko iritzi publikoaren aurrean orain bezain biluzik”, eta horregatik dei egin die “beren ondorioak ateratzera, Estatuko erakunde gorenean oso arazo larria duzuelako”.