Estefania Beltran de Heredia EAJ-PNVren Senatuko bozeramaileak Pedro Sanchez Espainiako Gobernuko presidenteari galdetuko dio ea, uztailaren 1etik abenduaren 31ra bitartean izango duen Europar Batasuneko Kontseiluko presidentziari begira, autonomia-erkidegoek Kontseiluko alderdi ezberdinetan duten benetako parte-hartzea sustatzeko asmorik duen, Espainiako Estatuaren barruko eskumen-banaketa errespetatuz.

Datorren astearteko kontrol saioan, gainera, Almudena Otaolak Espainiako Gobernuari galdegingo dio ea Gorte Nagusietatik datozen legeak hizkuntza ofizial guztietan promulgatzeko aurreikuspenik dagoen. Senatari jeltzaleak justizia-administrazioan euskararen erabilera sustatu ahal izateko, justiziako profesionalek beren hizkuntza-eskubideak gauzatzea eta prozedura judizialak euskaraz egin ahal izatea erraztuz.

Mozioa. Azkenik, Maribel Vaquero senatariak mozio bat defendatuko du, Estatuko Administrazio Orokorraren eskumenekoak diren garraiobide guztietan irisgarritasun-betebeharrak bete ditzala eskatzeko Gobernu zentralari. Eskaera, funtsean, Euskadiko aldiriko trenbideko garraioan oinarritzen da, bai geltokiei dagokienez, bai material ibiltariari dagokionez; izan ere, legeak hala agintzen badu ere, ez dira betetzen mugikortasun mugatuko pertsonentzako sarbideari buruzko arauak.