EAJ-PNVko Almudena Otaolak senatariak Kultura eta Kirol ministroari Artistaren Estatutuaren aplikazioan bizkortasun handiagoa eskatu dio babes eta segurtasun handiagoa emateko, eta kultur sektorearen bizi eta lan baldintzak hobetzeko. Arratsaldeko kontrol saioan, Otaolak gogorarazi dio Miquel Iceta ministroari urtebete baino gehiago igaro dela Artistaren Estatutuari buruzko Txostenean onartutako 57 neurrietatik 38 ministerio eskudunekin edo negoziazio mahaian adostuta zeudela iragarri zuenetik, eta gaur egun “erdia baino apur bat gehiago baino ez daudela amaituta”.

Aurrerapausoa balioesteaz gain, Otaolak Iceta ministroari eskatu dio azal dezala zer egoeratan dauden egiteke dauden bederatzi neurriak eta negoziatzen jarraitzen duten 17 neurriak. “Kronograma bat izatea gustatuko litzaiguke”, eskatu du senatari jeltzaleak, eta ironiaz esan du “agian inozoa izatea da, horrek ez duelako bermatzen beteko duzuenik, ezta sinatzen baduzue ere”. “Gauzak egiteko daude eta denbora mugatua da”, amaitu du Otaolak, legegintzaldia amaierara hurbiltzen ari dela gogoratuta.