Estefania Beltran de Heredia EAJ-PNVren Senatuko bozeramaileak migrazio politika integrala eskatu dio Espainiako Gobernuari, "erantzun eraginkorra eta berehalakoa emateko gai izan dadin, autonomia-erkidegoak inplikatuko dituena migratzaileen harreran, kudeaketaren pisu guztia lehenik jasotzen dituzten lurraldeen gain geratu gabe".

Barne Ministroak Kanarietako migrazioaren egoeraren berri emateko Goi Ganberan egindako agerraldian, Beltrán de Herediak adierazi dio akordioak bultzatu behar direla, "erantzunkidetasunagatik, autonomia-erkidego guztiek informazio nahikoa eta berehalakoa izan dezaten eta, beren eskumen-eremutik, migratzaileen babesa eta arreta beren gain har dezaten, administrazio bakoitzaren inklusio- eta arreta-eredua errespetatuz".

Azpimarratu duenez, "migrazio-politiken helburua bizitzak salbatzea izan behar da, hitzaren luze-zabalean; horregatik, Estatuen betebeharra da migrazioari giza ikuspegitik eta ikuspegi humanitariotik heltzea". Ildo horretan, ohartarazi du Kanarietan bizi den migrazio-egoera larriaren aurrean, Alderdi Popularra kezkatzen duena, batez ere, mugak sekurizatzea eta gotortzea dela.

Azkenik, Fernando Grande-Marlaskari adierazi dio Euskal Talde Parlamentarioak konfiantza eskasa duela iragarri duen Migrazioei eta Asiloari buruzko Itunaren aurrean, Europako Kontseiluko Espainiaren presidentzian lortu beharreko mugarritzat jo duen ituna. "Gure konfiantza urria da mugak kontrolatzeko eta sekurizatzeko neurrien errefortzuan oinarritzen delako lehentasunez, horrela, eskuineko eta ultraeskuineko alderdien immigrazioaren aurkako diskurtsoak elikatzen dira, migratzaileak terroristekin eta gaizkileekin parekatzen dituztenak, eta beren politika populista gizartean beldurra sortzean oinarritzen dutenak.