Senatuko Euskal Talde Parlamentarioak ez dio babesik eman Espainiako Gobernuari Estatuko Fiskal Nagusia kargutik ken dezala eskatzeko proposamenari, kargu horri dagokion arazoaren jatorria bi botereen arteko banaketa eza dela uste baitu, eta “horren errudunak batzuk zein besteak zarete” egotzi die Igotz Lopezek, PPri eta PSOEri. Pedro Sanchezen Gobernuari Álvaro García Ortiz kargutik kentzea eskatzen zion Alderdi Popularraren mozio baten eztabaidan, senatari jeltzaleak egiaztatu du gaur egun ardura hori duen pertsonaz gain, "arazoa egiturazkoa" dela.

Hori agerian uzten du, Lópezen ustez, Gobernuko presidenteak "nahierara izendatutako" Botere Judizialeko kargua izateaz gain, Fiskaltzaren Estatutu Organikoa arautzen duen legeak berak agintaldiaren iraupena Gobernuaren kargu-uztearekin lotzen duela. "Ministroek kargua uzten dutenean uzten du, beste ministro bat balitz bezala, Exekutiboaren beste zati bat balitz bezala, eta ez da horrela ", nabarmendu du.

EAJ-PNVko ordezkariak gogorarazi du Europako Batzordeak eta Europako Kontseiluko Ustelkeriaren aurkako Estatuen Taldeak behin baino gehiagotan ohartarazi diotela Espainiako Estatuari Estatuko Fiskaltza Nagusiak Exekutiboarekiko beharrezko independentziari buruz, eta GRECOk bere azken txostenean gomendatu duela Fiskal Nagusiaren hautaketa metodoa eta agintaldia berriz aztertzeko, eta, gainera, legez ezar daitezela Fiskal Nagusiaren eta Gobernuaren arteko komunikazioaren gardentasuna areagotzeko baldintza eta prozedura argiak, eta azter daitezela Fiskaltzaren bitartekoen kudeaketari autonomia handiagoa emateko bideak.

Senatari jeltzaleak azken lau hamarkadetan PPren eta PSOEren Gobernuek izendatutako Estatuko Fiskal Nagusien hainbat jarduera eztabaidagarri zerrendatu ditu, baita bi alderdietako goi kargudun batzuren adierazpenak ere, Estatuko goi epaileen gainean duten kontrolaz harro. "Alfonso Guerrak ‘Montesquieu hil da’ aforismoa sortu zuen; ez da hil, hil egin duzue eta zapaltzen jarraitzen duzue, ez dadin berpiztu", esan du Igotz Lopezek.