Senatuko Euskal Talde Parlamentarioak salatu du Elma Saiz Gizarteratze, Gizarte Segurantza eta Migrazio ministroak ez duela erantzunik eman amiantoaren biktimentzako konpentsazio-funtsa sortzeko legea garatzeko araudia noiz sartuko den indarrean galdetu zaionean. Nerea Ahedok gogorarazi du 2022ko urrian onartutako legeak 90 eguneko epea ezartzen zuela, 2023ko urtarrilaren 20ra arte hain zuzen ere, aipatutako erregelamendua onartzeko eta, ondorioz, indarrean sartzeko, baina "zuk arau hori lehenetsi zenuenetik zazpi hilabetera, Escrivá ministroak iragarri zuen datatik 15 hilabete igaro direnean, eta legeak ezartzen zuena baino 20 hilabete geroago, ez dago erregelamendurik eta funtsa ez dago martxan"; baina interpelazio hori "datarik eman gabe, ez zehatzik ezta gutxi gorabeherakorik iragarri gabe" erantzun dio ministerioko arduradunak.

Era berean, Nerea Ahedok deitoratu egin du Saiz ministroak agertu duen "arinkeria" mantendu duenean pertsona horien eskubidea dagoeneko aitortuta dagoela legearen onarpenarekin. "Gaur esan ez baduzu ere, otsailean adierazi zenuen atzerapen horrek ez ziela kalterik egiten biktimei, eskubidea aitortuta zutelako. Ezin gara desadosago egon, araudirik gabe ez dagoelako funtsik, eta, gainera, hutsune bat sortzen da onartu zenetik orain arte, eta denbora hori, kasu honetan, funtsean garrantzitsua da ", baieztatu du.

Senatari jeltzaleak aitortu duenez, legeak (Eusko Legebiltzarrak duela hamarraldi bat tramitatzen hasi zuena) justizia egiten du, berandu bada ere, eta biktimentzako errekonozimendua eta erreparazioa dakartza, eta zor historiko bat kitatzen du, nahiz eta "ez dakigun noiz kitatuko den", zehaztu du, eta adierazi du, erregelamendurik ez dagoen bitartean, ez dagoela aukerarik legez aitortutako eskubidea egikaritzeko, konpentsazioak eskatzen hasi ahal izateko. "Noiz arte?", esan dio ministroari.