Senatuko Euskal Talde Parlamentarioak Nicolas Madurori eskatu dio Venezuelan trantsizio demokratikoa ahalbidetzeko, terrorea eta errepresioa amaitzeko, hauteskunde-akten benetako frogak eskaintzeko, preso politikoak askatzeko, eta asteburuan Hego Amerikako herrialdean atxilotutako Jose Maria Basoa eta Andres Martinez euskal herritarren giza eskubideak eta eskubide prozesalak bermatzeko.

Luke Uribe-Etxebarria senatari jeltzaleak adierazi duenez, Plataforma Bateratuak ezagutzera eman dituen aktetan oinarrituta –“egiazko akta ofizialak, eta ez faltsuak-, Edmundo Gonzalez Urrutia Venezuelako presidente demokratikoki hautatua da, eta salatu du Madurok herritarren artean beldurra eta atzera egitea eragiten saiatu izana, herrialdeak egun bizi duen ezegonkortasunaren eta izuaren erantzule eginez. Halaber, Venezuelako herritarren benetako herri-subiranotasuna errespetatzeko eskatu dio. "Frogaren karga ez da alderantzikatu behar, eta Maduroren erregimenean egon behar du, benetako emaitzak ezkutatu dituena; oposiziogileek, berriz, argitaratu dituzten aktak argi eta garbi eta arazorik gabe eskaini dituzte nazioarteko egiaztapen independente bat egiteko, egin beharko litzatekeena, baina horretarako, bitxia bada ere, Venezuelako Hauteskunde Kontseilu Nazionalak lagundu beharko luke, akten kodeak gurutzatzeko".

Uribe-Etxebarriak gogorarazi du “Maduroren menpe” dagoen CNEk Aktak argitaratu ez izana, “gardentasun demokratiko faltaren ariketa eskandalagarria" dela, eta denborak aurrera egin ahala, haren sinesgarritasun politiko eta demokratikoa "are gehiago hondatzen dela". Aldi berean, EH Bildu gogoratuz, "argazkirik txarrena Maduro bezalako diktadore bati emandako babesa eta txalo zaparrada ematearena” dela esan du. “Aktak dira herri-subiranotasunaren adierazpenaren funtsezko froga, eta hori ez da errespetatzen ari; eta, Maduroren erregimenaren eskuliburu manipulatzaileari jarraituz, batzuek diote, EH Bilduk besteak beste, Plataforma Bateratuak argitaratutako aktak faltsuak direla ".

Ordezkari jeltzaleak PPk Venezuelaren egoerari buruz aurkeztu duen mozioaren harira hitz egin du. Euskal Taldeak ez du ekimen horren bozketan parte hartu, "ez gatozelako bat PPk Espainiako Gobernuak Venezuelarekiko duen jarreraz egiten duen interpretazioarekin". "Maduroren aurkako Plataformaren batasunaren adibideari jarraituz, hemen ere hitz egitea eta alderdikeriak saihestuz ekimenak adostea gustatuko litzaiguke", azpimarratu du Uribe-Etxebarriak.