Senatuko Euskal Talde Parlamentarioak eskaera bat erregistratu du Senatuko Mahaiari abortuaren aurkako nazioarteko goi-bilera bat egin dadin Goi Ganberako areto bat uzteko hartu zuen erabakia berriz azter dezan, eta ekitaldia egiteko baimena atzera bota dezan.

Senatuko Mahaiak uztailaren 17an hartutako akordioaren arabera (Alderdi Popularrak gehiengo osoa du bertan), Network for Values eskuin muturreko nazioarteko erakundeak (Jaime Mayor Oreja PPko ministro ohia ohorezko presidentea da) antolatutako VI. Goi Bilera transatlantikoa egiteko areto bat uztea erabaki zuen; abenduaren 2an, ‘askatasunaren eta bizitzaren kulturaren alde’ lelopean.

EAJ-PNVk adierazpen-askatasuna eta aniztasun politikoa defendatzen dituen bezala, berdintasuna, errespetua eta askatasuna ere defendatzen ditu. Hori dela eta, uste du legegintza-ganberak ez diola inola ere aterperik eman behar abortuaren aurkako goi-bilera horri, indarrean dagoen legeriarekiko errespetuarekin bateragarria ez den ideiak zabaltzen dituen erakunde batek sustatzen duelako, zehazki, emakumeen eta LGTBI kolektiboaren oinarrizko eskubideei dagokienez. Halaber, bere iritziz, Alderdi Popularra gehiengo absolutua modu espuriarrean erabiliz Goi Ganberari egiten ari zaion eskuineko eskoramenduaren beste adibide bat da, eta berriz ere Ganberaren ospeari eta neutraltasun-betebeharrari kalte egiten diote.