EAJ-PNVk proposatuta ekimenez, Senatuak legea aldatzeko eskatu dio Espainiako Gobernuari, lanbide-heziketako ikastaroak emateko produkzio-sektoreko adituak kontratatzeko epea 10 hilabetera arte luzatu ahal izateko. Egungo legediak sei hilabetera mugatzen ditu iraupen mugatuko kontratuak, eta, beraz, Euskal Talde Parlamentarioak proposatutako aldaketak aukera emango luke aipatutako profesional horiei luzatu ahal izateko, baldin eta prestakuntza-eskaintza sei hilabetetik gorako aldian ematen bada, harik eta ikasturtearen iraupenarekin bat egin arte.

Jeltzaleen ekimena aho batez onartu da gaur goizeko Lan eta Gizarte Ekonomiako Batzordean. Nerea Ahedok beharrezko lege-aldaketak egitea planteatu du, Langileen Estatutuaren 15.2 artikuluan ezarritako denbora-muga hori irakasle funtzionarioarena ez den beste figura horri aplikatu ez dakion, nahiz eta legeak esaten duen irakasle-laguntzako funtzioak betetzen dituela. "Ezingo lioke prestakuntza-prozesuari beharrezko jarraipena eman: edo ikasturte erdia egingo luke edo ikasturte erdian pertsona aldatuko genuke, eta hori ez dakit pedagogikoki onena den”, mahai gaineratu du. “Nolabait, profesional horiek kontratatzeko aukera baliogabetzen da, prestakuntza behar jakin batzuk asetzeko figura garrantzitsua direnean", azaldu du Ahedok.

Senatari jeltzaleak adierazi duenez, iraupen jakineko kontratuen helburuarekin ados dago EAJ-PNV, behin-behinekotasuna mugatuz eta kontratu mugagabeari lehentasuna emanez, baina azpimarratu du, halere, eztabaidatutako kasuetan bezala, "araua egokitu egin behar dela".