EAJ-PNVren ekimenez, Senatuak Errusiak Ukrainaren aurka egindako eraso gerra gaitzestea onartu du gaur, baita independentzia, existitzeko eskubidea, subiranotasuna eta Ukrainako lurralde eremuaren osotasuna etengabe babesten dituela berrestea ere. Inbasioa hasi zenetik hiru urte bete direnean, Luke Uribe-Etxebarriak aurkeztutako ekimena aho batez onartu da, baina EH Bilduk ez du parte hartu ekimenaren eztabaidan eta bozketan.

Senatari jeltzaleak Ukrainako Herriak inbasioaren aurrean erakutsitako heroitasuna eta sakrifizioa azpimarratu ditu, eta Donald Trump Etxe Zurira iristeak AEBk Ukrainari ematen dion babes politiko eta militarra geldiaraztea eta Ukraina eta EB kontuan hartu gabe negoziazioak hastea ekarri izana deitoratu du, "lortzen ari den gauza bakarra Putin adoretzea baita". Hori dela eta, "Ukrainari eragiten dion ekimenik Ukrainarik gabe ez hartzeko" beharra nabarmendu du, baita "Europar Batasunak Europaren segurtasunari eragiten dioten eztabaidetan ere" parte hartu behar duela ere, onartutako mozioak jasotzen duenez.

Halaber, mozioak eskatzen du EBk "benetako Kanpo Politika eta Segurtasun Politika Erkidea" gara dezala, "benetako eragile globala izateko tresna gisa, bere printzipio eta balioen arabera, Europan eta munduan bakea, segurtasuna eta oparotasuna bermatzeko, horretarako beharrezkoak diren tresna juridikoak erabiliz eta hedatuz". Testuak, halaber, bake "global, justu eta iraunkorra" babesten duela azpimarratzen du, Nazio Batuen Gutunaren printzipioetan eta nazioarteko zuzenbidean oinarrituta, Ukraina eta Europar Batasuna oparotasunean eta segurtasunean bermatzeko.

Azkenik, Europar Batasunari Ukrainari eta bere herriari laguntza politikoa, finantzarioa, ekonomikoa, humanitarioa, militarra eta diplomatikoa ematen jarraitzeko eskatzeaz gain, "beharrezkoa den denboran eta behar den intentsitatearekin, Errusiak ez baitu gerra hau gainditu behar" -aldarrikatu du Uribe-Etxebarriak-, onartutako testuak Europar Ukraina Batasunera atxikitzeko prozesua bizkortzeko lanak areagotzeko ere eskatzen du.