EAJ-PNVk 2028-2034 aldirako Europar Batasunaren programa espaziala planifikatzera premiatu du Espainiako Gobernua, horretarako, ezinbestekotzat jo du industria-sektore espazialaren, haren klusterren eta autonomia-erkidegoen parte-hartzea. Luke Uribe-Etxebarria senatariak Zientzia, Berrikuntza eta Unibertsitateetako ministroari osoko bilkuran aurkeztutako interpelazioan azaldu dionez, azken horiek "oso eskumen garrantzitsuak dituzte industria-politikaren eta berrikuntzaren arloan".

Senatari abertzaleak azpimarratu du espazioak garrantzi estrategikoa duela Europar Batasunaren interesentzat, bai ikuspuntu geoestrategikotik, bai aurrerapen teknologiko eta komertzialaren eta segurtasunaren iturri bezala, herritarren eguneroko bizitzako alderdi askotan funtzio garrantzitsua betetzen duten sistemak garatzeko. "Helburu eta politika askoren zerbitzura jartzen den aurrerabide-iturria dira, hala nola garraioa, mugikortasuna, informazioaren gizartea, segurtasuna, osasuna, industria-lehiakortasuna, ingurumena, nekazaritza, arrantza, finantza-merkatuak eta babes zibila", azaldu du.

Uribe-Etxebarriak Euskal Talde Parlamentarioak programa espazial berri horretarako egindako hainbat ekarpen aurreratu dizkio Diana Morant ministroari, gaur goizean Senatuan erregistratu duen mozioan gehiago zehaztu dituenak. Horrela, autonomia lortzeko espazioak EBrentzat izan behar duen izaera estrategikoa azpimarratzeaz gain, Europako espazio-industrien aldeko apustua egiten jarraitzeko deia egin du. "Beharrezkoa da jaurtitzaile europarrak garatzea, espaziora modu autonomoan sartzea ezinbesteko baldintza baita EBren autonomia estrategikorako; Europak beste potentzia espazialekiko duen mendekotasuna murriztea; Europako industria espazialerako finantzaketa hobetzea eta handitzea; ikerketan eta garapenean gehiago inbertitzea; eta arloan eskumena duten administrazioen artean gobernantza hobea izatea".