EAJ-PNVren ekimenez, Senatuak aho batez onartu du -Voxek izan ezik- Estatuko Gobernuari eskatzea babes-neurri komertzial eraginkorragoak eta anbiziotsuagoak har ditzala Europan, Euskadiko eta Europako industria siderurgikoaren bideragarritasuna bermatzeko. Goi Ganberako osoko bilkurak Luke Uribe-Etxebarria senatari jeltzaleak aurkeztutako ekimena onartu du, Europako Batzordeari "azkartasuna eta premia" eskatzeko, sektore siderurgikoa babesteko mekanismo berria 2026ko urtarrilaren 1ean martxan egon dadin, ekainera arte itxaron gabe, egungoa amaitzen denean.

Uribe-Etxebarriak egiaztatu duenez, egiturazko zirkunstantzietara gehitzen zaizkien faktore berrien ondorioz egoera zaila bizi du EBko industria-garapenean, egonkortasun eta aurrerapen ekonomikoan eta autonomia estrategikoan berebiziko garrantzia duen sektore honek. Horregatik, Europako ahalmenaren erabilera-tasa handiagoak ahalbidetzea proposatu du, inportazioen merkatu-kuota mugatuz. "Melted and poured jatorrizko araua ezarri beharko luke elusioaren arazoari aurre egiteko eta, horrela, Europako merkatuan iruzurrez sartu nahi diren siderurgiako produktuen trazabilitatea definitzeko", azpimarratu du. "Gainera – gaineratu du senatari abertzaleak-, oso litekeena da, Trumpen muga-zergen ondorioz, hirugarren herrialdeetako produktuak Europako merkatura bideratzea, Euskadiko eta Europako siderurgia sektorearen egoera are gehiago larriagotuz".

Era berean, mekanismo berriak indarrean dauden babes-neurriek estalitako produktu guztiak barne hartu beharko lituzkeela azpimarratu du, eta egungo babes-neurriak estaltzen ez dituen altzairuzko eta burdinazko zenbait produktu sartu beharko liratekeela, eta altzairutik eratorritako produktuen inportazioak gainbegiratzen jarraitu beharko litzatekeela. "Eta, baldintza egokiak betetzen badira, mekanismoaren irismena handitzea, babes oso eraginkorra behar duten deribatuak ere sartzeko", gaineratu du. Era berean, uste du EBk Estatu Batuekin negoziatu beharko lukeela Europako siderurgia-produktuetarako muga-zerga %50 jaistea eta munduko siderurgia-ekoizpenerako gaitasunari buruzko neurri bateratuak adostea.