Next Euskadi

Prentsa Aretoa

2024/02/21

EAJ-PNVk lehen sektoreari tresnak ematearen alde egin du, errentagarritasuna bermatuz ekonomia berde baterantz igarotzeko

Estefanía Beltrán de Herediak Euskadik Europar Batasuneko erabaki-organoetan "ahots propioarekin parte hartu" ahal izatea eskatu du, euskal nekazaritza- eta abeltzaintza-sektorearen errealitatera egokitutako neurri-esparrua defendatzeko

rss Ezagutzera eman

ARGAZKIA JAITSI

BIDEOA JAITSI

PARTEKATU BIDEOA

EAJ-PNVko bozeramaile Estefanía Beltrán de Herediak administrazioak lehen sektoreari errentagarritasuna bermatzeko eta ekonomia berderako bidean lehiakortasuna indartzeko tresnak ematearen alde egin du. Gaurko osoko bilkuran nekazaritza-sektoreari laguntzeko neurriei buruzko eztabaidan, Beltrán de Herediak adierazi du "sektore estrategiko" horrek aliatu nagusia izan behar duela trantsizio honetan, "baina ordenatua, errealista eta orekatua izan behar du; jasangarria ekonomikoki, sozialki eta ingurumenari dagokionez”.

Lehen sektoreak ingurumenaren iraunkortasuna bermatzeko interesik handiena duela eta dituen arazoak egiturazkoak direla adierazteaz gain, bozeramaile jeltzaleak produktuei prestigioa emateko eta horiek babesteko deia egin du, elikadura-katearen legearen aplikazioa ezarriz, produkzio-kostuen kalkulu-adierazleak gehiago finduz, katearen maila bakoitzeko prezioei buruzko gardentasun eta informazio handiagoa eskainiz, etiketatze argiagoak ezarriz eta banatzaileen konpromisoarekin.

Bestalde, adierazi du Euskadik oso argi duela bere nekazaritza-politika, "bere eskumenak garatuz egin behar duena", eta Europako erabaki-organoetan "ahots propioarekin" parte hartu ahal izatea eskatu du. "Hala ez den bitartean, Ministerioak EBn neurri komunen esparru bat defenda dezala eskatzen dugu, euskal nekazaritza- eta abeltzaintza-sektorearen errealitateari erantzun ahal izateko", gaineratu du.

Beltrán de Herediak egiaztatu du nekazaritza-ustiategiak oso heterogeneoak direla, eta horregatik Euskadi Plan Estrategiko Nazional bakarra ezartzearen aurka agertu zen NPBren negoziazioan. "Eskualdeetako plan estrategikoak dira NPBren aurrekontuak gauzatzeko formularik eraginkorrena, programak eta laguntza-ildoak eskualde bakoitzaren behar eta ezaugarri sektorial espezifikoetara bideratuta". Ildo horretan, kritikatu du NPBren laguntzen %80 ustiategien %20ra doazela gaur egun, banaketa orekatu eta bidezko sistema batetik urrun, korporazio handiak sustatzen baititu. "Familia-ustiapenen eredua defendatzen dugu, lurraldeari lotua, ekosistemen kontserbazioa, lurralde oreka eta kohesioa bermatzen duena, eta, gainera, enplegua eta elikagai osasuntsuak eta kalitatezkoak sortzen dituena", amaitu du. Egoera honetan, familia-ustiategiak dira ahulenak prezioen aldakortasunarekiko, merkatuen konplexutasunarekiko, NPBren baldintzatzaileekiko eta arauen anbiguotasunarekiko, eta gogorarazi du aldundiak eta Eusko Jaurlaritza erabat konprometituta daudela eta sektorearekin batera lanean ari direla eremu hori gainditzeko.

Next Euskadi
Ezagutu Gure Senatariak