Aurten euskaldun berriei eskaini nahi zaie, euskarak aurrera egiteko ezinbesteko izan diren horiei. Euskal gizartea ez da berez euskaldundu azken hamarkadotan, erakunde, eragile eta norbanako ugariren borondateari eta ahaleginari esker baizik. Guztiz aitortzekoa eta txalotzekoa da gizarte elebidunagoa osatze aldera milaka herritarrek euskara eurenganatzeko egindako urratsetako bakoitza, euskararen aldeko guzti horien hautua. Hizkuntzaren aurrerakada eurei dagokie neurri handi batean, hogeita hamar urteotan Euskal Autonomia Erkidegoan euskaradun bihurtu diren 300.000tik gora lagunei eta Euskal Herri osoan helburu berberak bultzatuta ekin diotenei. Asko zor zaie bizikidetzaren eta gizarte-kohesioaren aldetik, benetako elebitasunerako bidean eman dutenagatik. Hizkuntza askatasuna ofizialak diren biak menperatzetik dator, gurea baino ez dena zaindu, babestu eta sustatzetik. Eta asko izan dira, ahal izan duten neurrian ikasiaz, zailtasunez eta gabeziaz betetako garaietatik ekarpena egin dutenak eta euren seme-alabei ere euskararekin bat egiteko aukera eman dietenak.

Dei egin nahi diegu alderdikide eta alderdizale guzti-guztiei euskararen aldeko konpromiso sendoa har dezaten, bakoitzaren esparrutik gure hizkuntzaren hazia ereiten jarraitzeko. Ez dago ezagutzarik gabeko erabilpenik, baina behin ezagututa erabili egin behar da. Euskarak nekez joko du aurrera egunerokoan ahal denero mihi-ezpainetan eragiten ez bazaio, plazara eta mundura jalgi dadin bakoitzak bere aletxoa jartzen ez badu. Gure nortasunaren ezaugarri oinarrizkoenetakoak hiztunak behar ditu, gero eta komunitate zabalagoa, anitzagoa eta indartsuagoa osatzeko. Eta helburu hori lortze aldera euskaldun berriek ekarpen oso berezia egin dute, kostatakoa, balio erantsikoa. Guztion esker ona merezi duena. Hortik jo behar da aurrerantzean ere, kanpotik datorren jatorri eta sinesmen ezberdinetako lagun oro euskarara ekartzeko eta gure gizartean trinkotzeko. Euskaldun berri andanak emango dio euskarari gurean dagokion lekua, maila eta modu guztietako hiztunek aberastu eta osatuko baitute. Irabazitako horietako bakoitzak euskaraz aritzeko aukerak zabaltzen dizkio inguruko hiztun bakoitzari, egungo desorekak gainditzeko nahitaezko direnak.

Euskal gizarteak behin eta berriro erakutsi du euskara besteen pare nahi duela, eta erakunde demokratikoetatik egindako lana da horren isla. Hauen eta hezkuntza sistemaren lana osatu dute euskaldun berriek, debekuen eta jazarpenaren erruz itolarrian zegoena biziberritzeko. Euskararen Nazioarteko Eguna ez da oharkabean joatekoa, aldarrikapen hutsalekin estaltzekoa. Ginena eta garena izaten jarraitzeko asmoa berresteko eguna da, euskaldun egiten gaituena gogoratzekoa eta, batik bat, konpromiso zehatzak hartzekoa. Euskarak gutariko bakoitzaren beharra du, bihotzean gordeta bai baina batez ere eguneroko jardunean baliatuta, hainbat eta hainbat euskaldun berrik hutsetik abiatuz luzaroan egin duten antzera.